الضو قص وتونس تعرج

الضو قص وتونس تعرج...

ربما فما شكون باش يقول "عادي ايش بيه! ايش بيه؟ عطب...عادي! شوف مصر أو شوف لبنان"

لا! موش عادي في بلد مستقل منذ سنة 56. لا موش عادي في بلد يقول انو على خطى بلدان شمال المتوسط...لا! موش عادي بعد عشريات تبناو فيهم محطات كهرباء وجامعات تخرج مهندسين وتقنيين...لا! موش عادي في بلاد ناس تدفع فيها في الضرائب وتدفع في دم عينيها في فواتر الكهرباء....

لا! موش عادي في بلد فيه الصناعة والسياحة والفلاحة والنفط والفسفاط وفيه عشرة ملاين توانسة يعني حومة في الهند.

هاو إلي موش عادي:

- هي مؤسسة تمتص في المليارات كيف ال-STEG وهي كيف بزولة البقرة إلي طالع يحلب ويعبي وإلي هابط يحلب ويعبي.

هاو إلي موش عادي:

- هو غياب حوكمة وآليات متابعة لهاته المؤسسة...هي الرشوة والمناقصات المشبوهة والضبابية والتعتيم...هو عدم إحترام المواطن..هو التسيب والإهمال والتكربين والفصعة وقلة المواطنة  إلي خلاو الأمور توصل لها الحالة. 

إلي موش عادي هي السلطات العمومية  و عجزها و تملصها من مسؤولياتها...

لقد عشت أكثر من عشر سنوات في بلدان أوروبية ...الضوء كيف يبدا سيكوندة ما شفتوش قص...

أي دولة تحترم نفسها لا تفعل هذا بمواطنيها...آنيا لو تحترم هاته الحكومة شعبها يقع إقالة كل المديرين وعلى رأسهم ال pdg متاع STEG ثم التحقيق وتحديد المسؤوليات والمحاسبة

الضو قص وتونس تعرج...لا يزي TUNISAIR ...لا يزي SONEDE ... لا يزي SNCFT...والسبيطارات والتعليم وهجرة الآلاف من الجامعيين والجامعة والبيئة والوسخ...حتى كيف هرب بن علي  الضو ما قصش...

يبقى السؤال المطروح: إلى أي مدى سوف ينحدر التونسيون ببلدهم؟كنا نتشكاو قبل من قنديل باب منارة إلي ما يضوي كان على البراني ....صار قنديلنا أظلم أسود ...لا يضوي لا على براني لا على دخلاني