23 avril 2015

عندما يدافع عن هتلر في المباشر على إذاعة وطنية في حصة تبث في ساعة ذروة

صباح الخير ...موش من عوايدي نسمع في جوهرة فم الصباح ...واليوم الواحد قاعد يركز كيفاش باش يفيق ويستجمع في القوة متاعو وعاقد النية باش يعدي الجزء الأول من الصبحية في هدوء وتأمل ...فإذا به حوالي ال-7 و-50 دقيقة  على المباشر على البلاتوه كلام يخرج ينزل منزلة الصاعقة عليا ...المذيعة تعلق على خبر إيقاف مجموعة من الروس في موسكو في ذكرى ميلاد هتلر بأحد الحانات لأنهم يحملون صوراً لهتلر ثم تضيف في روسيا يوقفوا في الناس إلي تهز في صور هتلر وفي تونس يعملوا في دخلات الباك بأعلام عملاقة لهتلر ....طيب جميل إلى حد الآن ولكن السيد  الكارثة إلي بجنبها وكان يعلق على الأحداث، بكل وقاحة، وبكل جهل وبكل غرور وبكل ما يعنيه كلامه من خطر إلي يوصل للبهامة إلي تضرو تسمم الفكر  يزعم على المباشر انو معقول جداً أن يحاكم هؤلاء الناس في روسيا نظراً لتاريخ الحرب ما بين النازية وروسيا ولكن عادي أن يخرج أولاد الباك عندنا بعلم هتلر على خاطر ما عندنا معاه حتى مشكلة في تونس ...وقتها فهمت علاش البلاد هاذي حكمتها الحجامة والطرابلسية ومن بعد النهضة والمرزوقي وتوا السبسي والشيخة موزة وعلاش تونس تمد في داعش بأكثر عدد من المقاتلين.

نحب نقول للسيد الوقح والجاهل والمعتد بجهله  انو هتلر وفكره العنصري التطهيري العرقي هو فكر خطير على الإنسانية جمعاء صحيح ماهوش الوحيد  ولكن لن ننسى وأنو ها الفكر التدميري ساهم في مقتل الملايين من الأبرياء في العالم وانو لو كان جاء هتلر حي راهو عملو صابونة وانو من واجبنا أن نقاوموا النازية والفاشية والعنصرية والتطرف الديني وكل مظاهر التطرف  ....فهمت زادة أن تونس والعائلة والمجتمع فشل في انو يجلب المعرفة والعلم ويصقل وينير العقول ضد الجهل والتطرف والعنصرية وفهمت انو فهم التاريخ هنا بسيط وقائم على العاطفة والإنفعالية ...

إلى جوهرة فم ها السيد إلي تكلم ماعادش يلزمو ياخو المنابر ويلزمو يعتذر قبل ذلك ويلزم الهايكا تتدخل وخسارة يا تونس الجهل مصيبة وكارثة

hitler chez jawhara


Commentaires sur عندما يدافع عن هتلر في المباشر على إذاعة وطنية في حصة تبث في ساعة ذروة

Nouveau commentaire