تبرير العنف عند صفحات النهضة وموقفهم من فكرة التمرد

حول تبريرهم  للعنف

 شفت فما رد على الفايسبوك قطعان النهضة مهبطة فيه تورط شخصيات أخرى في كلام عنيف وبما أني شبه متأكد انو سوف يأتيني ذاك الرد إذ أن القطعان غير قادرة على صياغة رد شخصي فها هو ردي على جوابهم ال-template

• دائما عندما تحكي مع النهضاوي عوض انو يعترف، يبدا يبرر وشبي هذا...وشبي هذاكا... و بلا بلا بلا... ما تفهموش انوا التوانسة ضد العنف وضد الحرب الأهلية و انو فما فما سياق من سياق يتقال فيه كلام ... كل من حرض على العنف توجبت مقاضاته مهما كان لونه ومن قال لك أني لم أسكت على من حرض على العنف سابقاً هذا ونحب نزيد إنو فما ناس متورطة فعلياً في العنف ويعرفهم القاصي والداني وعددهم بالمئات ولم يحرك أحد في هاته الحكومة ساكناً ضدهم... وحكاية اللطيف إلي ضربة ضربتين مطلعينهالنا غناية قديمة وأول واحد يتعامل مع اللطيف هو عماد الدغيج وعصابتو وحكاية التجمع إلي نهار كامل تحكيو بيها ما شلكتها كان النهضة وآخر حكاية تم اخيرا تسمية عفيف الهنداوي الوزير والسفير السابق في عهد بن علي والمدير العام السابق للمدرسة القومية للادارة مكلفا بمهمة لدى رئيس الحكومة ابقاه الله ذخرا للتجمعيات والتجمعيين والازلام. تحصين الثورة بدا يعطي في أكلو: القروي ومرجان عاملين مبادرة والغرياني والقلال والمظفر أطلق سراحهم؛ حكومة التروييكا وجهازها القضائي إلي خاضع هيكلياً للتنفيذي تبلغ أقصى حالات الثورية في هذا الشهر الكريم فكعبة الزلم من الذين أطلق سراحهم قد هاكا ..؛افرح يا حامد القروي وارقص...
  وفي الختام السياسيين الكل زبل، أما فما درجات لم ار في حياتي أزبل من التجمع والنهضة والتجمع حطوا الشعب على برة في إنتظار كنس الدكتاتورية الناشئة

  حول موقفهم من فكرة التمرد

  • ايجاو نعملوا الbilan بكل إيجاز:

     غلاء الأسعار فاحش
    تردي الطاقة الشرائية فاحش
    الوضعية البيئية بالبلاد مزرية 
    البطالة والميزيريا بالبلاد مستفحليين 
    الإقتصاد التونسي بارك 
    في الأثناء الوزراء ليس لهم أية نية في معالجة المظالم ولم يفعلوا شيئاً من أجل ذلك 
    يخدموا اليد في اليد مع ناس ثبت فسادهم 
    يضربوا في الملاين والسيارات الفارهة والسفريات VIP 
    ازلام بن علي خرجتها النهضة من الحبوسات مقابل خدماتها 
    المجلس التأسيسي يمتص في المليارات وهو غير جدير بالإحترام 
    المدة الإنتقالية وفات عندها عام
    العنف والعصابات والميليشيات السرية تصول وتجول 
    كل شيء ضبابي وغير واضح 
    خطاب الحزب الحاكم مزدوج وعلاقاتو العالمية مشبوهة 
    برنامجو لاهو سياسي ويعتمد على الدعوية وفيه إزدواجية في الخطاب 
    على أرض الواقع فما مساومات وبيع وشراء و-chantage وواضح أنهم لا يؤمنون بالديمقراطية وهمهم الوحيد البقاء في الحكم غير أرضى علينا يا أمريكا وفرانسا وبرة
    هذا الكل ويلوموا على الناس إلي تحب تتمرد ... و زيد يهددوا فيهم بولاد الفاميليا إلي عندهم...

    ياخي نتوما تضربوا في المليان وساقيكم في الشواري وتحبوا الناس تسكت؟؟؟ ...

    لو كانت فيكم ذرة كرامة واحدة لخرجتم منها وحدكم ودعيتو لإنقاذ توافقي
    واصلوا في العمى فإن جاء الطوفان سوف يجرفنا جميعا...وعوض أن تحاسبوا من نخبتم دايرين على إلي ينقدوا فيهم..فيقوا من التكبر و الكبرياء والغرور متاعكم وافهموا انو جماعتكم في الحكم هم بصدد السطو على الثورة...وإن لم يخرج دستور لكل التونسيين ضامن للحقوق وإن لم تغيروا الطريقة التجمعية في التعيينات وإن لم تفصل السلطات عن بعضها وإن لم يتم سياق العدالة الإنتقالية بكل جرأة وشفافية  وإن لم تكن هيئة الإنتخابات مستقلة بالفم والملا لإجراء إنتخابات حرة و نزيهة وإن لم توقفوا ميليشياتكم فإن الشعب لن يسكت... جايينها جايينها...الوقت لا يرحم...فاتعظوا قبل فوات الأوان...راهي تونس تتسع للجميع إن احترمتم قواعد اللعبة الديمقراطية!